එල්පිස්ගෙ මල් පොකුර

 රුදුරු සුළඟට හසුව

අබලන්ව බිඳවැටුණු

පියාපත් මැලියමින් අලවන්න

පැලැස්තර දමාගෙන

යළි වරක් පියාඹමු

අපේක්ෂාභංගත්ව දුරැලන්න

⁣නැතක් සෝ තැවුල් බර

සුසුමකින් ඉවතලා

⁣එල්පිස්ගෙ මල් පොකුර සිපගන්න

ජීවයේ මල් පෙත්ත

නොගිලිහී රැඳෙන්නට

හඬ අරන් ඈ සමඟ සිටගන්න

නිවි නිවී යළි දිලෙන

තාරකා පොදිවලට

අත වනා නෙත් කඳුලු පිසලන්න

ඔබට මම, මට ඔබද

අත් නොහැර රැඳේනම්

දිරි අරන් පය පෙරට ගෙනියන්න

පිපෙන මල් ඵල දරන

හෙට දිනට එළි ගෙනෙන

ගිනි පුපුරු ළය පත්ලෙ දල්වන්න

උදාවන වසන්තෙට

වෙර ගෙනෙන පදවැලක්

මා සමඟ තෙලි තුඩක අමුණන්න

#එල්පිස්ගෙමල්පොකුර

#යූටර්පි

2024.03.14 @9.08pm

සමනලුනි,

 නේක පැහැ දළපත්‍ර - මල්වලින් උගුල්ලා

පොළෝ තල මත අතුරලා

සිනහ සී පෙති මතට - පා තබා පොඩි කරති

දුක් කදුළු එහි සඟවලා

සමනලුන් තටු විදා - ඉඟිලෙතැයි බය නිසා

නව යුගයකට මඟ කියා

කෝෂයෙන් එන්න පෙර - දළඹුවන් මරනවා

කාකයට රජකම තියා

වැටෙන පියවර ගානෙ - යළි නැඟී වෙර ගනිව්

විලෝපික ඇස් මඟැර දා

හීන පියගැට පෙළේ - මුල් පඩිය හරි උසයි

⁣අත් නොහරිනූ කිසිම දා

තැලී පොඩි වී මැරුණු - දළඹුවන් ගැන කතා

නොකියාවි එයින් පසු දා

දුක් ගැහැට මැද වුවද - ඉගිල්ලුනු සමනලුනි

ලොව රැකෙන්නේ නුඹ නිසා

#යූටර්පි

26th October 2023 @7.13pm

කණමැදිරි එළි

පුරාහඳ එළි නොදුටු අමාවක දවසේ

කඳෝපැණි එළියකින් සැනහුනෙමි රහසේ

රැඳීමට නොහැකි තැන ළය මඬල පහසේ

ප්‍රේමයේ කවි ලියමි රෑ සිහින අහසේ

ආයාසයෙන් නිදන නෙතු පියන් අතරේ

ඇහි පිල්ලමට යටින් නුඹෙ රුව ම වැතිරේ

ඒ හීනයෙන් හෙලූ වැසි දියට කතරේ

සුන්දර ම පතොක් මල් නුඹෙ නමට ඇහැරේ

සීත වැසි ඇදහැලෙන කළුවර ම රෑක

දිලෙන පුළිගුවකි නුඹ ළය මඬල කොනක

උණුහුමට දැවටෙන්න නුඹ නොමැති විටක

මිදුණු ළය පිරිමදිමි දස දහස් වරක

#යූටර්පි

2023.08.25 @7.15pm

රාත්‍රිය මනරම්

 රාත්‍රිය මනරම් ය කවදත්

ඒත් නුඹ ළඟ නැති නිසා

ගුවනතේ මම දෙනෙත් ගෙනයමි

සඳට තරුවට අමතලා

ඝනට පැතිරුණු මේකුළක් උඩ

දිලෙන තරුමල් සැඟවිලා

හෙට ය පසලොස්වක ඒත් අද

තාරකාපති මියැදිලා

මුළු අහස් කුස අරක්ගෙන හුන්

වලාකුළු තල කොඳුරලා

කෙසේ හෝ නොහඬා ම දරනෙමි

කියා තව බර තර කළා

මේඝයෙන් හෙළු සුෂිර සුසුමක

මුසුව යන්නට සලසලා

නුඹ ම සොයනා මගේ සුසුමක්

මමත් එයට ම මුසු කළා

#යූටර්පි 

2023. 07. 31 @10.40pm

ගිනි පුපුරු

බොහෝ ආයාසයෙන්

අග්නි දළු නිවාලුව

ගිනි පුපුර සඟවලා 

නොපෙනෙනා තැනින්

ඒ පුළිඟු නිවන්නට

ශීත කඳු සෙවූයෙමි

⁣නමුත් ඒ ගිනි පුපුර

නිවුණෙ නෑ එයින්

යළි දැවෙන්නට බියෙන්

ඈතටම ඉඟිලුණෙමි

ආවරක හිම තුහින

දිය නොවනු රිසින්

හිම තුහින රැඳෙනුයේ

ආවරක පමණක ය

මතකයෙන් ගිලිහුණේ

අන්න ඒ සැණින්

ගිනි පුපුරු තවමත් 

එලෙසම ය! එතැනම ය!

එකම එක තත්පරෙන් 

ඇවිලුනා ඉතින්

#යූටර්පි 

10/07/2023

නාවාට තරහ නෑ

පොකුරු ගෙන ආමි

නුඹෙ නමට පවරන්න

හිම පියලි මත වැසුණු

හදවත ම අවුලන්න

හීන මන්දිර තනා

ආදරේ පවසන්න

නුඹ ආවෙ නැතිවාට

මං තරහ නෑ ඔන්න

මල් පිපුණු හිමිදිරියෙ

මකරන්ද විඳගන්න

නුඹෙ අතින් අල්ලාන

වාසිටියෙ ඇවිදින්න

හිම තුහින බිඳ දමා

උණුහුමක සැතපෙන්න

නු⁣ඹ තාම නාවාට

මං තරහ නෑ ඔන්න

මල් වැස්ස වැටෙනවිට

තෙමි තෙමී දිවයන්න

වරුසාව සැරවෙද්දි

හිරවරණෙ ගුලි වෙන්න

සියුරු නිවහන අගක

සවන් මත කොඳුරන්න

එන්නේම නැතිවාට

මං තරහ නෑ ඔන්න

#යූටර්පි

30/04/2023 @11.50pm

Photo එක නම් සෑහෙන්න කලින් ගත්තු එකක් 😅

මනස්පර්ශිත

දිලෙන තරුනෙත මදහසැති වත 

ඇසිපියන යට අඳිනෙමී 

නොනිදි මනනෙත අඳින රූ මත 

කිමිදෙමී මම සැනහෙමී 

මනස්පර්ශිත මුවඟ දෙතොලත 

සිපගමී ඉන් ඉපිලෙමී 

මනඃකල්පිත මැඳුරු ගුවනත 

සැතපෙමී යළි සැතපෙමී 

හ්ම්ම්.... 

මිරිඟුවේ ගිලෙනා නෙතු පියන් හැරුණා 

යථාලොව දුටු මා සුසුම් පොදි බීවා 

කියඹු වැල් ලිහුණා නෙත සිසිල දැනුණා 

සීත රෑ මුමුණා මට රහස් කීවා

ළමැද පිරිමදිනා අග්නිදළු නැඟුණා 

දැවෙන හද මත මා ඉකිලුමක් ලීවා 

 #යූටර්පි 

 2023. 05. 23 @10.08am 

Pic source: Here

---