දළඹු සොහොන!

නෙතඟ උණුහුම නොදී 

හද කඳාමිණ වසා

වැසුණු ඇසිපිය යටින්

වචන සිතුවම් කළා 

හීන මල් පෙති පොදී

⁣පෝරකේටම ලියා

සිනිඳු අත්තටු නොදුටු

දළඹුවෙක් මියගියා

වලාකුළු මත රැඳී

මාළිඟා බිඳ දමා

පො⁣ළෝ යමහල්වලින්

ජීවිතේ හළු කළා

කඳාමිණ රිදි රිදී

යදින ගී අස අසා

සුසුම් පොඳ ඉල්ලනා

දනට ගැරහුම් කළා

#යූටර්පි 

2023.04.03 @10.05 am

#GiveUsOurStolenDreamsBack

#GiveUsOurStolenFutureBack

#මැරිලවත්යන්නෑහිවලා

Pic source: https://images.app.goo.gl/jbGmg8UfRDYkRYo4A

දවල් හීන!

මොකදැයි ය නුඹ මගෙ සිතේ හබය

හුදෙකලාවම පමණි මැද වුව ද සබය

ළය තුරම දවාලන ගිනි පුපුර නුඹ ය

නුඹේ රුව ඇන්දේ ම හදේ නුබ ගැඹ ය

නම පමණ අඩක් දැන ආවාට හේම

මීන දෙනයනින් මගෙ හිත කඩනු කෝම

අහස් මාළිඟාවල හිටියාට ප්‍රේම

එකම එක පිළිතුරක් නැත්තෙ ඇයි තාම

මක් කරනවා ඇති ද තැවේ ළය ගාව

අනේ තත්පරයකට සිහිවේද මාව

ප්‍රතිවදන් කිම වේද තැවීගෙන භාව

ඒ නිසාමද තාම පණිවිඩේ නාව

රළු කොපුල් මැඳ පියුම් පෙති පළොල් පාට

ඇදී දෙපසට වක්ව සිනහ දුටු දාට

මට ඇහෙන මගෙම හද තව ඇසුණි කාට

සිහිනයෙන් වියළි දෙතොළඟ තවමි රෑට

මල් පිපුණු උයනකදි අතින් අල්ලාන

ඉන්න හැකිනම් දිනක් තුටු ය සන්තාන

උණුසුම් ම හැඟීමක් ළයේ හංඟාන

ඇහැරෙන්න ඕනෙ මට ඇති දවල් හීන

#යූටර්පි

2023.01.31 @5.07pm

Written for The Kaleidoscope 

Pic source: https://th.bing.com/th/id/OIP.eqDqUKPr9pfESuGr9Dc0FQHaJA?pid=ImgDet&rs=1

සිටුවන්නට පෙර

පාට පෙති ඇති

මල් ඉති ගෙනත් සිටුවති

රුව ඇති බෝම සුවඳැති

ඉන් ඵල නොවේ හටගති

පිපි ලෙස නැවත පරවෙති

නොරැඳෙති හඬති නෑසෙති

සුවඳද කෙමෙන් හැරයති

යළි තනිකමට හුරුවෙති

අඳුරේ ගුලිව වැළපෙති

රන් තරු රෑන නොදකිති

මං තනි කවුරුවත් නැති

සුසුමන් ⁣ඉතින් නිම් නැති

වසත් කළ පමණක් ඇති

මල් ඉති කුමට සිටුවති

අඳුරෙදි එළිය දුන් නිති

තරු කැල නොයති නවතිති

තම තම මන උයන්පැති

සිටුවනු රුක් සදා ඇති

මල් පමණකින් නොනැවති

ඉන් ඵල ඔබට ගෙන දෙති

නොවඩා රුකක් ඵලනැති

බෝ සාවධානයෙන් නිති

තෝරා නිසිම අතු ඉති

⁣හැරගනු සුසුම් තව නැති

Muse Euterpe

16/02/2023 @10.25pm

Pic credit: https://www.peakpx.com/en/hd-wallpaper-desktop-nirfc

නිමා වූ වසන්තය

 නිමා වූ වසන්තය

කලට කලියෙන් පිපුණු මල්පෙති

සුවඳ තබමින් පරවුණා

සදාකාලික කලු වලාකුලු

හිස් අහස මත පාවුණා

නෙතු පියන් යට අකල් වැහි බිඳු

වසන්තය ගෙන නික්මුණා

රෑ අහස් කුස පුංචි තරුකැට

සඳ සොයා එහි වැලපුණා

කතර මිරිඟුව අතර හිනහෙන

සඳවතිය මට හිනහුණා

අහස් ගැඹ වෙත වඬින්නට බෑ

වසන්තය අවසන් වුණා.

නිමා වූ මල් සමයෙ සුපිපුණු

මල් සුවඳ ළඟ දැවටුණා

පරව ගිය මල මගේ සඳවත

නෙතු පියන් තව බරවුණා

පුංචි තරුකැට හඬා වැළපෙන

අහස මැද මම තනිවුණා

අනේ සඳවත මගේ හදවත

නුඹේ නමටම හැඬවුණා

නිමා වූ කාලයක නටඹුන්

ශීත සමයක දිලිසුණා

සුසුම් ගී මැද මගේ තරු කැට

වසන්තය ළඟ හිනැහුණා

#යූටර්පි

අනෝරා වැසි අවසන

 වලා රොදකට රඳනු බැරිවන

දිය එමත තව රැඳේනම්,

අහස කලු වී ගිඟුම් නඟමින් 

අනෝරා වැසි වහිනවා.

වැටෙන තරමට රුදුරු මහ වැහි 

දරාගන්නට නොහැකිනම්,

පොළොව මත වුව පිටර ගං දිය 

කිඳා නොබැසම ගලනවා

සිහින සිඳලූ ගිනි අගුරු මත 

තවත් ඇවිදිනු නොහැකිනම්,

ගිනි නිවන්නට රිදෙන ඇස් අඟ

නොනිම් මහ වැසි වහිනවා.

වැටෙන තරමට කඳුළු වැහිකැට 

දරාගන්නට නොහැකිනම්,

සියලු සුරසැප සපිරි මැඳුරෙද 

තවත් හුස්මක් නිවෙනවා 

#යූටර්පි 

ඉස්සර ලියපු එකන්. ආයෙ දැම්මා.

Photo: #TunishaSharma

ඉඩෝර කුසුම උපන්ගෙයි මරා දමමි.

 ඉඩෝර කුසුම උපන්ගෙයි මරා දමමි!

____________________________

ඉඩෝරේ කළ ගෙවී අවසන

වියළි ⁣බිම එක මලක් පිපුණා

පමණ හදවත තබා ඒ ළඟ

යන්න යනවා මං

හිමිකමක් තව දන්නෙවත් නැති

මනෝ ලෝකෙක ඉඟිලි ඉඟිලී

උපතටත් පෙර මරපු හැඟුමක

සුසුම් සැලුවා මං

වැටී බිඳෙනට බෝම ළං ඇති

කඳා හදවත ළයේ රැකගෙන

වැටෙන්නැති වැසි පිරුණු මේඝෙක 

බරක් දැරුවා මං

නෙතින් ⁣ගිලිහෙන වරම්වත් නැති

මහා පර්වත බරැති කඳුළක්

දැවි දැවී ලන ගිනි පුපුරු

සිනහවෙන් වැසුවා මං

#යූටර්පි 

2023.01.25 @22.34

Pic credit: https://images.app.goo.gl/4nP3R4KyD4hsHiGx7

කාන්තාරේ මං

 කාන්තාරේ මං

____________________

ඉඩෝරේ හමා යන වියළි සුළඟේ ගැවසි

හදවතට කොයි සබඳ පිපුණු මල්පෙති පලැසි

වඩිනතුරු බලාගෙන හිඳිය මුත් දිනිදු සිසි

අහස්දිය වැටෙනතුරු පොළෝ ඉරි තැලුම් දිසි

වැහි බිඳෙන් පරවරිත දිනිදු කිරණින් සැරසි

ඉඳුචාප ගුවන මත පායනා කළ නොදිසි

කතර කවදත් නොවේ පොඳ වැස්ස කී අවැසි

මහ ඝෝර වරුසාව වැහැපන් ඉතින් නොවැසි

හැමදාක මහ රෑට ස්වප්නයේ වූ විලැසි

ගංගාව උතුරන්න විදපන් ය හී මලැසි 

සඳ බෝම ඇතිවාට සෙනසුරුට සේ ම දිසි

අනේ මං එළිය ඇති සඳ නොදුටුවෙම් ය නිසි

2023.01.04 @18.30 

#යූටර්පි 

Pic source: https://pin.it/2og1obb